Særalderspåslag
Særalderspåslag er eit livsvarig tillegg til alderspensjonen for personar med særaldersgrense (aldersgrense lågare enn 70 år). Gjeld for dei som er fødde i 1963 eller seinare.
Tilsette med særaldersgrense som vel å gå av ved særaldersgrensa, har kortare tid til å tene opp pensjon i tenestepensjonsordninga. Særalderspåslaget skal kompensere for manglande pensjonsopptening for dei som må eller vel å slutte tidleg.
Du må ha jobba minst 20 prosent i ei stilling med særaldersgrense i 10 av dei 15 siste åra før særaldersgrensa, eller før du pensjonerer deg. Særalderspåslaget utgjer ein prosentdel av pensjonsgrunnlaget i stillinga med særaldersgrense.
Storleiken på prosentdelen er knytt til aldersgrensa.
- 65 år: 5,8 prosent av pensjonsgrunnlaget i stillinga med særaldersgrense
- 63 år: 6,5 prosent av pensjonsgrunnlaget i stillinga med særaldersgrense
- 60 år: 7,7 prosent av pensjonsgrunnlaget i stillinga med særaldersgrense
Dersom du har inntekt samtidig med særalderspåslaget, vert det redusert.
Reglane for særalderspåslag er ved utgangen av 2024 ikkje klare. Denne skildringa er basert på høyringsnotatet «Nye pensjonsreglar for tilsette i stilling med særaldersgrense, 20.06.2024». Vi ventar ikkje at regelverket vert avklåra før nærare 2026. Dei som i løpet av 2025 får rett til særalderspåslag, vil få det etterbetalt når regelverket er vedteke og vi kan rekne ut beløpet.