Trygg pensjon i urolege tider

– Mange spør oss om dei må ta investeringsval for pensjonen sin. Med offentleg tenestepensjon treng du ikkje bekymre deg for at pensjonen blir påverka av verdssituasjonen, seier pensjonsekspert Svein Rasmussen i SPK.

1,2 millionar offentleg tilsette har pensjon i SPK.

– Offentleg tenestepensjon i SPK blir ikkje investert i aksjar eller fond, og blir derfor ikkje påverka av svingingar i aksjemarknaden.

Pensjonen aukar årleg i takt med den generelle lønnsveksten i samfunnet.

– I SPK treng du altså ikkje å følgje med på marknaden, eller ta stilling til korleis pengane skal investerast. Pensjonen din er trygg, føreseieleg og ikkje minst livsvarig, seier Rasmussen.

I tillegg til den årlege reguleringa, er det to måtar å påverke pensjonen sin på: jobbe lengst mogleg, og vente med å ta ut pensjonen. Dette gjeld både offentleg og privat sektor.

– Sjekk kva du kan få ved å bruke pensjonskalkulatoren på spk.no. Der kan du sjå korleis ulike val påverkar pensjonen din, tilrår Rasmussen.

Pensjonssparing i SPK

• Pensjonene i SPK er ikkje plassert i aksjar eller fond. Den er statsgarantert.
• Pensjonsparinga blir regulert årleg i takt med lønnsveksten.
• Offentleg tilsette slepp å ta investeringsval, eller velje risikoprofil.
• Det er mogleg å påverke storleiken på pensjonen ved å jobbe lenger og vente med å ta ut pensjonen.
• Offentleg tenestepensjon er livsvarig.