Kva er pensjon?

Alderspensjon handlar om å sikre deg ei stabil inntekt når du ein dag sluttar å jobbe. Den består vanlegvis av fleire delar, avhengig av kor gammal du er, kor lenge du har jobba, og kva arbeidsgivarar du har jobba for i yrkeskarrieren din.

Alderspensjonen din er ein kombinasjon av pensjon frå folketrygda (Nav), tenestepensjon og egen sparing. Tenestepensjon er pengar arbeidsgivarane dine sparer for deg. 

For deg som er medlem i SPK, vil pensjonen din vanlegvis bestå av tre hovudelement:

  1. Alderspensjon frå folketrygda (Nav) 
    Pengar som staten sparar for deg - utgjer som oftast det største bidraget til pensjonen din. 
  2. Tenestepensjon frå SPK 
    Pengar som dine arbeidsgivarar sparar for deg – arbeidar du i staten kjem tenestepensjonen frå SPK 
  3. Eigen sparing  
    Pengar du sparar sjølv - for eksempel i pensjonskonto eller andre investeringar. 

Pensjonen frå folketrygda og tenestepensjonen frå SPK påverkast ikkje av børs eller renter, og dei betalast livet ut. Forvaltninga av pengane er også noko som handterast av NAV og Statens pensjonskasse. Du treng ikkje gjere noko.

Forskjell mellom årskull 

Pensjonssystemet er delt inn etter kva år du er fødd: 

  • Fødd i 1962 eller før:
    • Du tener opp pensjon etter kor mange år du har arbeida, og full opptening er 30 år som medlem. 
    • Du kan som regel ta ut alderspensjon frå månaden etter du fyller 67 år 
    • Du må trappe ned eller slutte heilt i stillinga di for å få alderspensjon utbetalt 
  • Fødd i 1963 eller etter:
    • Du tener opp pensjon i ei individuell pensjonsbehaldning, og du sparar opp til pensjon så lenge du står i jobb.
    • Pensjonen din er meir fleksibel og du kan jobbe samtidig som du får alderspensjon utbetalt 
    • Du kan ta ut pensjon allereie frå du fyller 62 år om du ønsker, og du kan jobbe samtidig så lenge du ønsker.

Korleis kan du påverke pensjonen din? 

Du kan ta val som gjer at du får mest mogleg i pensjon: 

  • Jobb lenger:
    • Fødd 1963 eller etter: Du tener opp til pensjon så lenge du står i jobb, heilt frem til du fyller 75 år.  
    • Fødd 1962 eller før: Du får meir i pensjon jo lengre du står i jobb og ventar med å bli pensjonist opp til eit tidspunkt. Les meir om det her.
  • Utsett uttak av pensjon:
    • Dersom du ventar med å ta ut pensjon, blir årlege utbetalingar høgare, fordi dei blir fordelt på færre år. Dette gjeld alle årskull.  

Kor mykje får eg i pensjon? 

Mange veit ikkje kor mykje dei kan få i pensjon, eller korleis dei kan påverke beløpet. Difor har vi utvikla ein enkel og praktisk pensjonskalkulator som dei fleste av medlemmane våre kan bruke. Der kan du sjå nøyaktig kor mykje du har tent opp, og kva du kan få i pensjon ved ulike tidspunkt.  

Bruk pensjonskalkulatoren: Logg inn på spk.no for å sjå kor mykje pensjon du har opptent, og kva ulike val vil bety for deg. Her er pensjonskalkulatoren (Du må logge inn)